Հաշմանդամություն ունեցող անձանց նկատմամբ այսօրվա մարդասիրական
վերաբերմունքը ենթադրում է հոգեբանական և սոցիալական վերականգնողական աշխատանքների
համակարգ նրանց տարիքային բոլոր փուլերում: Այդ պատճառով այսօր բոլոր քաղաքակիրթ երկրներում
մեծ աշխատանքներ են տարվում չտեսնողներին աջակցելու և նրանց հասարակության լիիրավ անդամներ
դառնալու ուղղությամբ:
Այդ գործընթացում մեծ տեղ են գրավում համակարգչային տեխնոլոգիաները:
Դրանցից մեկը համարվում է համացանցային ռադիոն: Այն նույնպես տեղեկատվության տարածման
միջոց է, ինչպես սովորական ռադիոն, սակայն ծրագրերի, երաժշտության հեռարձակումը կատարվում
է համացանցի միջոցով՝ աշխարհի ցանկացած կետում, որտեղ կա համացանցի հասանելիություն:
Եվ դա համարվում է այս ռադիոյի առավելությունը:
Այս համացանցային ռադիոն կարող է էականորեն փոխել չտեսնող և
թույլ տեսնող անձանց կյանքը՝ տալով նրանց նոր հնարավորություններ: Այն տեղեկատվություն
է փոխանցում հաշմանդամություն ունեցող անձանց սոցիալական կյանքի վերջին իրադարձությունների
մասին, տրամադրում է հարթակ՝ հաշմանդամություն ունեցող անձանց հաղորդակցման համար,
խնդիրներ և առաջարկներ է ներկայացնում իշխանություններին
և հասարակական կազմակերպություններին, ցուցաբերում է իրավաբանական, հոգեբանական աջակցություն,
տարածում է մշակութային բարձրագույն արժեքներ, աջակցում է հաշմանդամություն ունեցող
անձանց բազմակողմանի զարգացմանը և կրթությանը: Նաև հանդիսանում է միջնորդ՝ չտեսնողների,
նրանց ծնողների, մասնագետների, սոցաշխատողների միջև փորձի փոխանակման գործում:
Քանի որ հայերը սփռված են ողջ աշխարհով և այդ աշխարհասփյուռ
հայերի մեջ կան բազմաթիվ չտեսնողներ ևս, համացանցային ռադիոյի դերը կարևորվում է միմյանց
հետ կապ ստեղծելու, համագործակցելու, գաղափարների փոխանակման և այլ աշխատանքներ կատարելու
գործում:
Համացանցային ռադիոյի գաղափարը մի խումբ չտեսնող և թույլ տեսնող
խանդավառ երիտասարդների նախաձեռնությունն է, որն իրականություն է դարձել Երևանի Ս.
Շահնազարյանի անվան Կույրերի մշակույթի տանը՝ Հայաստանի Ինտերնետ հասարակություն կազմակերպության
աջակցությամբ, որի ուշադրության կենտրոնում է միշտ եղել Չտեսնողների և թույլ տեսնողների
աջակցությունը: Ծրագիրն իրականանում է մշակույթի տան տնօրեն Յուրի Ավետիսյանի և Հայաստանի
Ինտերնետ հանրություն կազմակերպության փոխնախագահ Արմեն Նազարյանի ղեկավարությամբ:
Ռադիո Մենքի ստեղծագործական կազմը հետևյալն է. Հակոբ Կարապետյան
(գլխ. Խմբագիր), Վահան Սահակյան (տեխնիկական պատասխանատու), Արեգ Ազարյան (ձայնային
ռեժիսոր), Սիփան Ասատրյան, Անդրանիկ Քոչարյան, Ռուդոլֆ Զաբրոդին, Մարիկա Սիրադեղյան
(հաղորդավարներ):
Արդեն առկա է ձայնագրման ստուդիան, Արդեն կատարվել են որոշակի
հաղորդումների ձայնագրություններ, իսկ հեռարձակումը կատարվում է հետևյալ կայքի միջոցով՝
www.radio-menq.am
Ռադիո Մենքի հիմնական նպատակը տեսողական խնդիրներ ունեցող անձանց
համար ճշգրիտ և կանոնավոր տեղեկատվության ապահովումն է հանրային կյանքի տարբեր ոլորտների
վերաբերյալ, ինչպես նաև նրանց ինտեգրման գործընթացին առավել արդյունավետ աջակցությունը:
Ռադիոյի շրջանակներում սպասվում են հետևյալ հաղորդումները. «Դու կարող ես (Մեծ կույրերը)»,
որի նպատակն է ներկայացնել համաշխարհային հռչակի հասած, ինչպես նաև հայաստանյան իրականության
մեջ որոշակի բարձունքներ նվաճած տեսողության խնդիրներ ունեցող անձանց կյանքն ու անցած
ճանապարհը, «Հոգեբանությունը կյանքում», որի նպատակն է տարածել հոգեբանական գիտելիքներ, որոնք կօգնեն մարդկանց
(նաև տեսողական խնդիրներ ունեցողներին) հասնել նոր արդյունքների, նվաճել նոր բարձունքներ,
ապրել ներդաշնակ և բարեկեցիկ կյանքով, քանի որ ժամանակակից կյանքը մարտահրավեր է նետում
մարդուն ունենալու անհրաժեշտ հոգեբանական գիտելիքներ և կարողանալու դրանք կիրառել կյանքում:
«Խնդիր և լուծում» քննարկումների շարքը, որն ամեն անգամ վեր է հանում հաշմանդամություն
(մասնավորապես տեսողական խնդիր) ունեցող անձանց վերաբերող մեկ խնդիր, և քննարկման ավարտին առաջարկվում է խնդրի
մեկ կամ մի քանի լուծում: Նախատեսված են նաև հետևյալ հաղորդումները. «Ծրագիր ամենափոքրիկների
համար՝ հեքիաթներ, պատմվածքներ երեխաների համար», «Սիրել մարդուն կամ իմ աշխարհը»,
«Իմ համալսարանները», «Պարալիմպիկ սպորտ», «Շտապ իրավաբանական խորհրդատվություն»,
«Հարցեր և պատասխաններ» և այլն: Սրանց միջոցով ենթադրվում է հաշմանդամություն ունեցող
ռադիոլսողներին տրամադրել իրավաբանական խորհրդատվություն, խորհրդատվություն փաստաթխթերի
և այն մասին, թե որ մարմիններն են պատասխանատու նրանց հուզող որոշակի հարցերի վերաբերյալ,
ինչպես նաև նրանց կրթական և այլ իրավունքների մասին:
Այսպիսով՝ ռադիոյում պատրաստվելու են թե՛ հատուկ հաղորդումներ՝
ուղղված տեսողական խնդիրներ ունեցող անձանց, թե՛ իրազեկող հաղորդումներ, որոնք կհետաքրքրեն
ցանկացած մարդու: Նշենք, որ մտադրություն կա այս ռադիոյի շնորհիվ տեսողության խնդիրներ
ունեցող, ապա նաև Հայաստանի այլ հաշմանդամություններ ունեցող Երիտասարդներին տրամադրել
խոսափող՝՝ վեր հանելու իրենց հուզող հարցերը:
